“حصل معايا موقف لذيذ قوي مع الديوان ، دونت مجموعة ملاحظات على اساس انى أكتبها ، فوجئت انى باكتب حاجه تانيه باكتب عن همومى انا مع الكتابه الجديده ديه . طبعا اللى فتحه اساسا هو ديوان صالح بشكل اساسى والملاحظات اللى كنت ناوي اكتب عنها تشبه كتابه نقديه . نازل طالع زي عصاية كمنجه …خلاص أنا دلوقتى مهيأ نفسى أتابع نزول وطلوع عصاية الكمنجه لكن ليه هيا عصاية كمنجه ،مش عصاية أى حاجه تانيه ..لو سلمنا انها عصاية كمنجه ،كمنجه يعنى موسيقا ..هل عزف منفرد ؟واللا عزف كعضو فى أوركسترا أو تخت ؟ايه طبيعة المعزوفه مين العازف؟ هل فيه عزف من أصله والا ده حد مبتدئ بيتدرب على استعمال الاله هل ده عزف لمعزوفه موجوده سلفا؟ والا موسيقا بتتألف حال العزف؟فأنا مهيأ لأسئله واستعدادات ما أملكش انى اشوف عصاية كمنجه نازله طالعه من غيررغبتى انى اسمع الصوت الملازم لنزول وطلوع عصاية الكمنجه .أنا دلوقتى لسه ما سمعتش حاجه انا شوفت من مسافه او زاويه ما ، تسمح بس بالرؤيه اذن عليا انى اقرب أو أغير زاوية الرؤيه يمكن اسمع حاجه ….ده مش كده بس …ولو ما أعرفش فى الفروق بين الأنواع الموسيقيه وبعضها أو ما أعرفش أفرق بين الموسيقا وال...
