صالح الغازي: احمد الحجار ألحانه بتجدد المعاني

"لململت خيوط الشمس علشان أغزل لك شال"

اشتريت ألبوم اتمنيت بداية التسعينات، وأسرني صوته وبدأت اتابعه بدقة ..سمعت كل البوماته وحتى الأغاني اللي لحنها لغيره وحبيت هدوءه وطيبته وصوته الحنين وطريقته في التلحين اللي بتجدد معانى الكلمات و كأنه بيديها من روحه.. أغاني كتير ما فارقتنيش في مدن كتير وعبر سنوات كتير، باسمعها باستمرار بنفس الشعور الأولاني : عيوني م العطش قايمه تنادي الليل على سلمى / اكرمنا يارب وعدلها / ورفعنا الحب على النزوة وهزمنا عدوك في الغزوة/ عود الفجر لسه بيبتسم/ صار العشق موالي / في كل عمر شبه صحرا حنين بينده على واحه/جيت ازورك يا نبي/ قلبي يا ابو الاحلام حب الخير ما تقولش بكام/ لما الشتا يدق البيبان/ كنت فاكر/ بحبك وانطلق عصفور واسبح في الهوا والنور/ ماتكدبيش يا شمس وتغيبي/اعذريني..

وطبعا محفورة في خيالي من وقتها مشاهد لا تنسى له مثلا: طريقة آداءه اغنية عود ...و حفلة على الحجار اللي استضافه فيها وكان والدهما ابراهيم الحجار معهما ..كانت حفلة فيها تجلي للفن والطيبة والأصالة..

ودعنا المطرب والملحن #أحمد_الحجار عن عمر 65 عاما

رحمه الله فنان كبير نقف قدام سيرته بكل التقدير ..

صالح الغازي

_____

احمد الحجار ملحن ومطرب مصري، نشأ في عائلة فنية لأب مطرب وملحن ومعلم لقواعد الغناء والموسيقى وهو (إبراهيم الحجار)، وشقيقه الأكبر هو (علي الحجار)، إلتحق (أحمد الحجار) بالمعهد العالي للموسيقى العربية، وتعلم العزف على آلتي العود والبيانو كما درس النوتة الموسيقية والمقامات الشرقية والغربية، وبدأ مجال الإحتراف وهو طالب فى السنة الأولى له بالكلية بلحن (أعذرينى) ﻷخيه (علي الحجار)، و لحن للمطرب محمد فؤاد أغنيات فيلم (أمريكا شيكا بيكا) ولحن العديد من الأعمال المسرحية ومقدمات المسلسلات التلفزيونية ولحن لهشام عباس وعلاء عبد الخالق وأنغام وأنوشكا وغيرهم، وله أربعة ألبومات غنائية.