أزايز الحنية حكاية من حكايات الجدات
الرقة والحنية لما فاض بيها الطاووس على بيته بدأ يلم الفايض و يعبيه في أزايز ويهديها لكل اللي يعرفهم وف يوم وهو بيوزع أزايز الحنية اتزحلق وقع، طلع السر الإلهي.
الطاووسه مراته زعلت وقعدت تصوت أزايز الحنية خلصت ونكشت شعرها ومشت في الشارع تصوت، قابلتها النخلة شافت حالتها وافتكرت إزازة الحنية اللي اخدتها، قامت قطعت جريده ومشت وراها وقعدت تقول أزايز الحنية خلصت وشافهم الغراب وافتكر إزازة الحنية اللي عنده، فنتف ريشه وقعد يشاور بيها ويقول أزايز الحنية خلصت .. ولما شافت الفرخه اللي حصل صرخت أزايز الحنية خلصت وافتكرت إزازة الحنية اللي أخدتها ..وفكرت: أنا لازم أعمل حاجه مختلفة.. دبت صابعها في عنيها فختت عنيها وبقت عاميا وقعدت تصرخ أزايز الحنية خلصت ...الشجرة قالت للفرخة يا خايبه يامايله! بقا مراته تنكش شعرها وتمشي تتصعبن، حقها طبعا ده طاووس والغراب ينتف ريشه والنخلة تخلع جريدة ..كله ح يتعوض الشعر المنكوش ح يتسرح والريشة المنتوفة يطلع بدالها ألف والجريدة تنمو بدالها تانية ..وانتى مش عندك بيت وبيض وكتاكيت.. وديك؟ ..يعني خسرت بيتك وعينك اتصفت.. 
وراحت عليك ولما انتي تقولي أزايز الحنية خلصت...ولادك وجوزك يقولوا إيه دلوقت، يخيبك مره!
--------------------------------------
من الحكايات الشعبية المتداوله ولها دلالات كتير
تعليقات
إرسال تعليق