أغنية النيل : شعر صالح الغازي
النيل حابي
أول فصل في كتابي
ع الضفة شاهد
مداين
معابد
جناين ..جناين
إحنا جاورنا السعيد.
النيل بسيط
يجمعنا في المندره
نشرب من القله
نشوي كيزان الدره
قوم نحصد الغله
هات شوال الطحين
الفرن مشتاق للعجين.
النيل يقدر ضيفه
يجود لنا بكيفه.
إشي فول و بصاره
وإشي وز
على صينية رز.
النيل محبة
أصفى م السما بحبه.
إيه أحلى من الرمان
قصب السكر
عيدان عيدان
جمعنا القطن
شوف كام طن.
البيوت مليانه خير.
على صفحته
يتراقص الطير
من فرحته
مفتون بريحة البرتقان.
النيل فتان
نسمه شقية
بتسابق نسمه خوافه
ريحة الجوافة
واصله للشط
أنا شوفت ضفدع نط
الصبايا تدلدل الرجلين.
جنبهم يسبح البط
من الطمي بيعملوا حنه
النيل جنه
القعده أحلا
وسط مليون نخله
و الا نقعد تحت
شجرة شعر البنت
إيه أحلا من النبت؟
غير بحر النيل.
العفار ..
من مسابقة خيل..
حمار
بيجري بسرعه
جاموسه واقفه ع الترعه.
البلطي في الميه يبلبط
يبص لينا ويتنطط
حاولنا نصطاد
ما عرفناشي
قمنا شوينا الدره
وغلينا الشواشي.
لمة فسيخ و بصل.
الي حلمناه هوه اللي حصل
واللي طلبناه هوه اللي وصل
الشاي على الراكيه يسطل.
مركبه جايه تسأل
اللمة تطول العمر كام ضحكة
والشجر مصفوف على السكة
والنيل موصوف دوا
ما تقلش كام بوسه.
طارت في الهوا
ع الدكة ننوس جنب ننوسه.
رزق بياع الترمس
بياع البطاطا بيبسبس
بياع الورد بيغلس
الجو ح يخليني أنعس
يحلا الشرود في الليل
النيل
طقس الهيام
تدريب على الأحلام
الطله فيه تسحر
النيل
أصيل
النيل بسيط
وغويط
جه من الحبشة
وصل خيالي
ولا انتهاشي.
النيل كان نجاشي
لما وصل عندي
بقى تحدي
على بلاد كتير بيعدي
لكن مين عنده حضارتي؟
النيل ماشي
النيل معاشي.
ساعة المخاطر
تمساح ..حاضر
واقف زنهار
فكين كبار
وناب أزرق
نعمل اللي علينا
وربنا يرزق.
النيل ساعي بريد
شايل الرساله من بعيد
حافظ مساره
عارف أسراره
خليه يسلم أمانته
ويوصل لنا رسالته.
----------------------
أغنية النيل
شعر صالح الغازي
نشرت
في صحيفة أخبار الأدب
2 مايو 2021
20 رمضان 1442
رابط مجموعة من القصايد وآخر جزء منها يحتوي على قصيدة أغنية النيل
تعليقات
إرسال تعليق