قصيدة صالح الغازي نظرة نعمان الأعصر إلى المحلة الكبرى في صحيفة الأهرام

الشارع الطويل

لا يرضى يدخله تاكسي،
وتخبط راسك
في سقف الميكروباص
بمعدل 100 خبطة في الثانية.

أوله دكاكين
بتسد الطريق
وآخره ضلمه
قافله الخيال.

الحُفر أكتر من الناس،
والناس أكتر من اللازم
اسم الشارع مش لازم،
ممكن على اسم أول بيت
يعني مجهول.
ولا ذنب للجهالة.

لأ.
الحقيقة المجرمة
أنه باشا قد الهيبة.
كان عمدة للمدينة،
هو اللي عمل أول طريق دائري
وأول مجلس بلدي
وأول بنك وطني،
خصص مكان لقلعة الصناعة،
من قبل ما يقولوا
"دور يا موتور"

دلوقتي لو زارنا بعد ميت سنة
شاف الموتور عطلان
والطريق الدائري
اللي على اسمه
بقى مجرد شارع
مضروب سكينة في بطنه
وبينزف مجاري
ياترى ح يبصلنا إزاي؟

-------------------------------
شعر : صالح الغازي
إلى #المحلة_الكبرى

في صحيفة الأهرام المصرية 

نشرت بتاريخ 

13-1-2018

قصيدة صالح الغازي    نظرة نعمان الأعصر   إلى المحلة الكبرى في صحيفة الأهرام 

علي الرابط

http://gate.ahram.org.eg/News/1780607.aspx